Како што веќе знаете, Хенри Кавил се откажа од улогата на Супермен во филмскиот универзум на DC и реши да се фокусира на една поразличен проект, што барем според фотографиите, му стои многу, многу добро. Погледнете го него и останатите актери од серијата „The Witcher“ во продукција на Netflix.
„The Witcher“ е базирана на популарната видео игра со истото име, со мала разлика – во серијата Гералт (Хенри Кавил) ќе биде нешто помлад, бидејќи Netflix реши да го адаптира изворниот материјал, книгите на авторот Анджеј Сапковски.
Иако и понатаму чекаме Netflix да објави трејлер или тизер за серијата, тие решија да нѐ почестат со неколку фини, детални фотографии на кои можеме да ги видиме Хенри Кавил и останатите актери од „The Witcher“. Покрај Кавил, имаме прв поглед и на Ања Чолатра (Јенефер) и Фреја Алан (Сири).
Фотографиите доаѓаат заедно со постер, на која може да се види Гералт како е свртен со грб, а на него пишува „Најлошите чудовишта се оние кои самите ги создаваме“.
„Базиран на серијата бестселери, ‘The Witcher’ е епска приказна за вербата и семејството. Гералт од Ривија, самостоен ловец на чудовишта, се обидува да го најде своето место во светот каде луѓето ќе се покажат како поопасни противници од чудовиштата. Но, кога судбината ќе го однесе до моќна магионичарка и млада принцеза со опасна тајна, тројцата ќе мораат да го пронајдат патот низ непријателскиот Континент“, пишува во краткиот опис за серијата на Netflix.
Она што го знаеме досега е дека серијата ќе се појави на есен, но и понатаму нема конкретен датум од Netflix.
Серијалот на видео игри „Witcher“ е голем хит кај гејмерите низ целиот свет, а секое ново продолжение дополнително ги „навлекува“ луѓето да ја играат и да се интересираат за поголемата приказна околу овој наслов.
