Најголемите фудбалски ѕвезди моментално се на ЕУРО во Германија, а во групната фаза од натпреварувањето бевме сведоци на бројни обиди на навивачите да влетаат на теренот за да се фотографираат со своите идоли.
Но, има и такви кои легално успеале да застанат покрај големи фудбалски ѕвезди, а секако тоа се деца кои заедно со фудбалерите излегуваат на теренот пред почетокот на натпреварот.
УЕФА на паузата помеѓу крајот на групната фаза и почетокот на осминафиналето објави интересна компилација од фотографии од натпреварите на кои се гледа воодушевувањето на децата кои имаа можност одблиску да ги видат најголемите асови на светскиот фудбал.
„Спомени кои ќе траат цел живот“, напиша УЕФА, а сигурно е дека децата од тие фотографии може целосно да се согласат со таа констатација.
Секако, најчесто децата беа воодушевени од средбите со Кристијано Роналдо и Килјан Мбапе, а нивните изрази на лицето беа навистина бесценети. Чиста среќа, би рекол некој.
