Лука Модриќ и следната сезона ќе го носи дресот на Реал Мадрид.
Клубот од Мадрид сè уште не ја објавил веста за продолжување на договорот со 36-годишниот капитен на хрватската репрезентација, но шпанските медиуми дознаваат дека сè е договорено.
Мадридски AS пренесува дека Модриќ е „вечно на Реал“ и дека се договорил за условите од новиот договор. Водечкиот клуб од шпанското првенство направи преседан за хрватскиот играч за врска и му понуди автоматско продолжување на договорот доколку се исполнат одредени услови од следната сезона.
1 + 1 договор, па останува во Реал Мадрид и по завршувањето на кариерата
Долгогодишното правило на Реал е да им понуди на ветераните договор на само една сезона, но Модриќ како миленик на тренерот Карло Анчелоти и навивачите на Реал доби договор на 1 + 1 година. Тоа значи дека тој ќе остане во Реал до летото 2024 година доколку собере одреден број настапи следната сезона.
Реал и Модриќ начелно се договориле, тврди AS, дека Хрватот ќе остане во клубот во улогата што ќе ја избере и по завршувањето на играчката кариера. Модриќ е во Реал Мадрид од 2012 година кога тогашниот тренер Жозе Мурињо го донесе од Тотенхем за 35 милиони евра.