Покрај бројните кампањи за прифаќање и сакање на сопственото тело и борбата против стереотипите и наметнатите „идеали“ за убавина од модната индустрија, многу жени се опседнати со слабеење.
Обично со доаѓањето на летото расте и притисокот за „идеалната линија“, со оглед на тоа дека носиме потенка и поразголена облека, а евентуално ќе се појавиме и на плажа.
Се чини дека медиумите и модната индустрија не помагаат во оваа насока, па ги „бомбардираат“ жените со инстант диети и гардероба што го „крие вишокот килограми“.
Списанието Shape во соработка со компанијата FitSugar спроведе истражување на оваа тема и резултатите се загрижувачки.
Неверојатни 82 проценти од жените кои биле анкетирани рекле дека чувствуваат притисок да ослабат пред почетокот на летото, а 68% би се откажале од секс еден месец и повеќе ако за возврат би имале „совршено тело за на плажа“.
Околу 50% од жените се изјасниле дека си го мразат стомакот, а за 29% од жените извор на најголема несигурност во врска со нивното тело им е формата и големината на бутовите.
Повеќето од испитаничките рекле дека почнуваат да вежбаат во пролетните месеци за да имаат поголема самодоверба кога ќе отидат на плажа, а 47% од нив пријавиле дека најмногу правеле вежби за намалување на стомакот и струкот.
Жените кои чувствуваат притисок да ослабат велат дека најмногу за тоа ги обвинуваат социјалните мрежи како Facebook.
Она што навистина загрижува е податокот дека околу 90% од нив никогаш не би „лајкнале“ своја фотографија во бикини на која се тагнати од друг, а дури 44% од испитаничките рекле дека би ги замолиле пријателите да го тргнат тагот или да ја избришат таквата фотографија.
Половина од жените кои учествувале во анкетата рекле дека најудобно се чувствуваат во костим за капење само пред пријателките и партнерот, а на 18% од нив им било пријатно во машко друштво кога носат костим за капење или бикини. Помалку од 10% од испитаничките се чувствувале привлечно така облечени пред непознати луѓе.
Околу 60% редовно почнувале диета пред летната сезона, 53% внимавале на внесот на калории, 22% се откажувале од јаглехидрати, а 15% се одлучувале за алтернативни решенија.
За 79% од жените најголем проблем им претставува симнувањето на „последните пет килограми“ пред заминување на одмор.
Резултатите од анкетата, за жал, ја потврдуваат загриженоста дека денешната култура поставува нереални идеали за убавина, односно дека само жените кои се слаби, затегнати и со мазна кожа може добро да изгледаат во бикини, што предизвикува несигурност, анксиозност и нарушувања на самодовербата, како и здравствени проблеми.
