За признанието најдобар фудбалер во Европа во сезоната 2015/16 ќе се борат Кристијано Роналдо, Герет Бејл и Антоан Гризман.
Европската куќа на фудбалот ги обелодени имињата на тројцата кандидати кои ќе се борат за признанието најдобар во Европа во сезоната 2015/16, а меѓу нив не е името на Лео Меси.
Минатиот месец УЕФА ги соопшти десетмината кои добија најмногу гласови од новинарите од сите 55 земји членки, а списокот со тројцата конечни кандидати беше објавен денеска.
Најдобриот стрелец во Европа, Луис Суарез и неговиот соиграч од Барселона, Лео Меси не се во најтесниот избор.
Аргентинецот Лионел Меси првпат по подолго време не е номиниран меѓу тројцата најдобри фудбалери во Европа.
Португалецот Кристијано Роналдо со Реал Мадрид ја освои Лигата на шампионите, а со својата репрезентација стана и европски првак на ЕВРО 2016.
Герет Бејл, од „кралскиот клуб“ исто така е европски клупски шампион, а со Велс стигна до полуфинале на Европското првенство.
Французинот Антоан Гризман имаше одлична сезона во Атлетико Мадрид, а беше и најдобар стрелец и најдобар играч на ЕВРО 2016.
Луис Суарез беше пред Меси во овој избор и се пласира на четвртата позиција според гласовите, додека меѓу десетмината место најдоа и Џанлуиџи Буфон, Тони Крос, Томас Милер, Мануел Нојер и Пепе.
Победникот ќе биде објавен на 25 август, кога во Нион ќе се одржи извлекувањето за групите во Лигата на шампиони.
