Сергеј Анохин, член на Извршниот одбор на Фудбалскиот сојуз на Русија, изјави дека земјата ќе се пријави за организација на Европското првенство во 2028 година и во 2032 година.
Рускиот Спорт-Экспресс пренесе изјава на еден од челните луѓе на тамошниот сојуз, во која потврди дека Русите планираат кандидатура за организација на натпреварувања на најдобрите европски репрезентации.
„Извршниот одбор одлучи да се пријавиме за домаќини на Европското првенство во 2028 и во 2032 година“, изјави Анохин.
Рокот за поднесување пријава за домаќин на ЕУРО за 2028 година е до 23 март, односно до денес. Официјалното именување е во септември, 2023 година. Засега кандидати се Турција, заедничка пријава имаат Романија, Бугарија, Грција и Србија, има и заедничка пријава на Обединетото Кралство и Ирска.
Постои можност ЕУРО од 2028 година да се игра во нов формат и наместо досегашните 24 репрезентации да играат 32 тима.
Поради руската инвазија на Украина, Русија е санкционирана апсолутно во сите спортови и од сегашна гледна точка, земјата нема никаква шанса да биде организатор на овој настан.
