Филаделфија 76ерс и Сакраменто Кингс се првите тимови кои поведоа со 2:0 во овогодинешниот НБА плеј-оф. Тоа значи дека шампионот Голден Стејт Вориорс првпат ги загуби првите два меча во серија во ерата на Стеф Кари, а сега треба да победи на четири од пет натпревари против „кралевите“ за да продолжи да ја брани минатогодишната шампионска титула.
Уште поголемо изнанадување е што тоа им се случува против Кингс, кои се во плеј-офот за прв пат од 2006 година. Оттогаш, Вориорс девет пати беа во плеј-офот, освоија пет шампионски титули и уште два пати играа финале, само еднаш беа елиминирани во првото коло, а во ниту една серија не остварија помалку од две победи.
Кингс синоќа ги совладаа со 114:106, а го „прекршија“ натпреварот во последните три минути. Откако тројката на Клеј Томпсон намали на 102:101, тие одговорија со серија 10:2, во која со лејап учествуваа Домантас Сабонис и Харисон Барнс, а со тројки Де'Арон Фокс и Дејвион Мичел.
Сабонис и Фокс постигнаа по 24 поени, на кои литванскиот центар додаде девет скока, а исто толку асистенции имаше и брзиот плејмејкер, додека Малим Монк придонесе со 18 поени од клупата. Вориорс ги предводеа Кари со 28, Ендрју Вигинс со 22 и Томпсон со 21 поен. Серијата сега се сели во Сан Франциско, каде Вориорс ќе се обидат да израмнат на 2:2.
Истиот предизвик ги очекува и Бруклин Нетс, кои Филаделфија ги совлада со 96:84 и исто така поведе со 2:0. Тајрис Макси експлодираше со 33 поени, Џоел Ембиид имаше 20 поени, 19 скока, седум асистенции, но и осум загубени топки, а Тобијас Харис додаде 20 поени и 12 скока. Најмногу за Нетс постигнаа играчите кои пристигнаа од Феникс во замена за Кевин Дурент - Кем Џонсон 28 и Микал Бриџис 21.
Филаделфија - Бруклин 96:84
(Филаделфија води 2:0)
Сакраменто - Голден Стејт 114:106
(Сакраменто води 2:0)
