Фудбалската асоцијација на Уругвај испрати отворено писмо до Фудбалската асоцијација на Англија во кое ја повикува да ја укине казната за Единсон Кавани.
Имено, ФА на Англија го казни Кавани со три натпревари и 100.000 фунти за „расистичко однесување“ на социјалните мрежи.
Напаѓачот на Манчестер Јунајтед влезе од клупа на гостувањето кај Саутемптон и постигна два гола за пресврт и победа од 3:2. Неговиот сонародник и пријател кој на Instagram под името pablofer2222 му го честиташе одличниот настап на социјалната мрежа.
Кавани ја сподели објавата и му одговори со „Gracias Negrito“ (Фала ти, Црнче), што е прекар на неговиот пријател. Но, според правилата на ФА, таа порака е дискриминирачка и навредлива, па Уругваецот беше казнет.
„Далеку од осуда на расизмот, Фудбалската асоцијација на Англија изврши дискриминаторско дело против нашата култура и начинот на живот на уругвајскиот народ“, се вели во соопштението.
Тие нагласуваат дека Кавани не сторил ништо што може да се толкува како расизам, туку дека употребил термин што се користи во Латинска Америка.
„Единсон Кавани никогаш не сторил никакво дело што може да се протолкува како расизам. Само употреби вообичаен израз што се користи во Латинска Америка кога сакате да му се обратите на некој сакан или близок пријател“, стои во писмото.
Тие бараат ФА да ја повлече казната затоа што на тој начин покажува непочитување на уругвајската култура.
„Со тоа вие казнувате не само една личност, туку целата култура, нашиот начин на живот, што е вистински дискриминирачки и расистички потег“, се вели во соопштението.
