Цените на акциите на Волстрит паднаа бидејќи слабите макроекономски податоци ги поддржаа стравувањата дека агресивното зголемување на каматните стапки од страна на американската централна банка ќе предизвика пад на економијата.
Dow Jones загуби 0,59 отсто, на 33.403 поени, додека S&P 500 се лизна за 0,58 отсто, на 4.100 поени, а индексот Nasdaq 0,52 отсто, на 12.126 поени.
Најмногу паднаа цените во индустрискиот сектор
Во седум од 11-те најважни сектори на индексот S&P 500, цените на акциите вчера паднаа, најмногу во индустрискиот, 2,25 отсто и енергетиката, 1,7 отсто.
Ова е резултат на новите податоци кои покажуваат дека растот на американската економија забавува.
Извештајот, според кој фабричките нарачки паѓаат втор месец по ред, ги потврди податоците објавени ден претходно за слабеење на производната активност.
Дополнително, понудата на нови работни места падна во февруари на најниско ниво во последниве речиси две години, што покажува дека пазарот на труд „се лади“.
„Бројот на понуди за работа падна, што покажува дека вработувањето забавува, а тоа е лошо за економијата. Тоа ги поддржа стравувањата од рецесија“, рече Сал Бруно, директор на IndexIQ.
Банкарскиот сектор е под притисок
Под притисок се најде и банкарскиот сектор, откако Џејми Димон, извршен директор на JP Morgan, во писмо до акционерите предупреди дека кризата на американските банки продолжува и дека влијанието од тоа ќе се чувствува со години.
Цените на акциите на Bank of America и Wells Fargo паднаа за повеќе од 2 отсто, додека индексот S&P 500 на банкарскиот сектор се лизна за 1,9 отсто.
Од друга страна, пазарот е поддржан од надежта на инвеститорите дека поради слабеењето на инфлаторните притисоци и забавувањето на економскиот раст, американската централна банка ќе престане со циклусот на зголемување на каматните стапки.
На пазарот на пари, се проценува дека има речиси 60 отсто шанси ФЕД дополнително да не ги зголеми каматните стапки во мај, додека шансите за зголемување на каматната стапка од 0,25 процентни поени паднаа на само 40 отсто.
И на повеќето европски берзи цените на акциите вчера паднаа. Лондонскиот FTSE индекс ослабе за 0,50 отсто, на 7.634 поени, а париски CAC за 0,01 отсто, на 7.344 поени. Франкфуртски DAX зајакна, пак, за 0,14 отсто, на 15.603 поени.
