Мудроста како особина не е нужно поврзана со годините, туку со знаењето, искуството, вештините и особините кои некој ги поседува.
По дефиниција, мудроста се опишува како склоп од искуства, знаење и умешност на расудување. Иако најчесто ја поседуваат луѓе во зрело животно доба, нужно не е поврзана со годините. Американски истражувачи анкетирале повеќе од 2.000 учесници за да откријат дали мудроста може да се „измери“, а таа цел ја формулирале во скала од седум фактори.
Испитаниците оценувале од 1 до 5 колку им се блиски одредени тврдења. Според истражувањето објавено во International Psichogeriatrics ова е скала од седум елементи кои ја чинат мудроста.
1. Саморефлексија – способност на човекот да се осврне на своите постапки, анализа на своето однесување и реакција во различни ситуации.
2. Просоцијално однесување – мудрите луѓе имаат развиена емпатија, способност да сочувствуваат со другите, како и толеранција и простување.
3. Контрола на емоциите – мудрите луѓе се одликуваат со внатрешен мир кој не е нарушен од секојдневниот стрес. На проблемите, нечие иритантно однесување, провокации, критики и лошо однесување не реагираат бурно, туку рационално и сталожено. Секогаш се над ситуацијата.
4. Прифаќање на различни перспективи – мудрата личност умее да ја согледа ситуацијата или проблемот од повеќе агли, да се измести од својата перспектива . тоа овозможува да донесе добри одлуки.
5. Одлучност – мудрите луѓе се одлучни, знаат што сакаат, кои им се принципите и вредностите кои се држат и од тоа не отстапуваат. Нивното мислење никогаш не е двосмислено ниту колебливо.
6. Давање корисни совети – ова е една од највидливите особини на мудрите луѓе. Тие, поучени од своето богато искуство и знаење научено од многу прочитани книги умеат да дадат вистински совет на тој што му е потребен, да укажат на грешка, но без осуди и критики.
7. Духовност – мудрите луѓе спознале некои вистини, нив не ги одушевуваат материјалните работи. Својата среќа ја наоѓаат во нешто возвишено и поголемо, во склад со тоа што живеат. Имаат развиена интуиција која секогаш ги води во вистински правец.