Фудбалерите на ДР Конго синоќа беа елиминирани во полуфиналето на Африканскиот куп на нации откако загубија од домаќинот Брег на Слонова Коска, но она што го направија пред почетокот на натпреварот го обиколи светот.
За време на интонирањето на националната химна, сите фудбалери и стручниот штаб ја ставија десната рака на уста, а со левата рака направија пиштоли и ги вперуваа во главите. Тоа беше само на почетокот, а потоа ја испеаја химната „Телама беси Конго“ (Станете Конгоанци).
Многумина во близина на ТВ екраните беа збунети од овој чин, а по натпреварот мистеријата беше решена.
Имено, конгоанските фудбалери на овој начин сакале да го свртат вниманието на конфликтот меѓу армијата и бунтовниците, припадници на паравоената формација М23, во источниот дел на нивната земја, каде што се раселени десетици илјади луѓе.
„Фудбалската репрезентација е симбол на националната гордост и сакавме да го свртиме вниманието на злосторствата што се случуваат на истокот на ДР Конго. Се надеваме дека тоа ќе престане“, изјави селекторот Себастјан Десабр, инаку Французин, кој исто така го испочитува потегот.
Фудбалерите на ДР Конго во текот на натпреварот носеа црни ленти, а на крајот беа поразени со 1:0 од домаќинот на Африканскиот куп на нации благодарение на голот на Себастјан Але во 65. минута. „Слоновите“ се пласираа во финалето каде во недела од 20 часот ќе играат против фаворитот Нигерија.