ВАР беше имплементиран за да ги разреши сите дилеми, но ноќеска во Јужна Америка се случи ситуација во која дури ни ВАР не можеше да најде решение.
Се играше натпреварот помеѓу репрезентациите на Венецуела и Парагвај во рамките на 2. коло од квалификациите за Мундијалот 2022 во Катар во зоната на Јужна Америка.
Во 65. минута по едно нафрлување во гостинскиот шестнаесетник Јанхел Ерера со глава ја заби топката во парагвајската мрежа за радост на домаќините. Главниот судија Андрес Рохас од Колумбија покажа на центарот, но потоа од ВАР собата му пратија сигнал да почека бидејќи регуларноста на голот е сомнителна.
На тројцата ВАР судии им требаше премногу време за да одлучат, па на крај го повикаа Рохас сам да пресуди. Но, и Колумбиецот не можеше да донесе одлука бидејќи од ниту еден агол не можеше убаво да се види дали Ерера играл со рака веднаш откако ја удира топката со глава.
Цела вечност траеше консултирањето на Рохас со ВАР собата, вкупно 4 минути играта беше во прекин, а на крај одлучија дека голот треба да се поништи. Иако не се гледа убаво дали имало играње со рака или не, пресуди наглото менување на траекторијата на топката веднаш по ударот со глава. Според судиите, тоа докажува дека топката удрила во раката на Ерера и затоа го сменила првичниот правец.
Венецуела потоа прими гол, а во 5. минута од судиското надополнувањето за трагедијата да биде поголема истиот Јанхел Ерера промаши удар од белата точка со кој ќе израмнеше на 1:1.