Денешниот начин на ладење на просторот е измислен, не затоа што на луѓето им било многу топло, туку за да се зголеми квалитетот на работата на една печатница од Бруклин.
Старите Римјани имале развиен систем на подно греење со топол воздух наречен Хипокаустум, користеле јаглен и дрво за греење, а во жешките денови со вода ги ладеле sидовите на своите куќи. Во 2 век во Кина бил измислен рачен вентилатор, во средниот век на одредени места куќите се разладувале со помош на вода и ветерници, но дури на почетокот на 20 век благодарение на напредокот во хемијата е измислена денешната климатизација.
Вилис Кериер, 26-годишен со диплома од Универзитетот Корнел, работејќи за компанијата Buffalo Forge во 1902 година се обиден да го реши проблемот во производството на негов клиент, компанија за литографско печатење од Бруклин. За да го подобри процесот на печатење, Кериер морал да воведе контрола не само на температурата, туку и на влажноста на воздухот во печатницата.
По тој повод го искористил добро познатиот метод на загревање воздух преку врели цевки и целосно го пренаменил. Воздухот во неговиот уред минувал низ многу ладни цевки кои биле исполнети со студена вода, а попатно со температурата можел да го контролира и процентот на влага во воздухот кој излегувал.
За печатницата, пониската температура и влажност помогнале хартијата да ги задржи формата и димензиите, а мастилото да се порамни.
Според критериумите на Кериер, уредот за климатизација не само што морал да овозможи контрола на температурата и влажноста, тој последователно додал уште два: климатизерот исто така морал да ја контролира циркулацијата на воздухот и вентилацијата, како и да го чисти воздухот. Својот патент од 1906 година го нарекол „апарат за третман на воздух“.
Наскоро, поради високите барања за климатизација, била основана компанија наречена The Carrier Air Conditioning Company of America, денес позната во светот како Carrier Global Corporation.
Првата приватна куќа која се ладела благодарение на системот смислен од Кериер се наоѓа во Чапел Хил, Северна Каролина. Во 30-тите години на минатиот век во оваа стара куќа изградена во 18 век во џорџиски стил, била поставена мрежа на цевки и отвори, добро скриени зад лајсни од кои избивал ладен или топол воздух.