На 31 година играчот од средниот ред изненадувачки одлучи да стави крај на репрезентативната кариера и тоа една година пред Мундијалот.
Тони Крос нема да повеќе да ги брани националните бои на Германија. Откако „ди Маншафт“ се соочи со елиминација од Европското првенство, а Крос го запиша настапот број 106, одлучи дека му е доста од репрезентацијата.
„Играв за Германија 106 пати. Нема да има друг натпревар. Очајно посакував и дадов сѐ од себе за на крајот да беа 109 натпревари и да завршевме со европската титула“, пишува Крос во соопштението кое сам го објави.
„Одлуката да се повлечам по првенството ја имав одамна донесено. Долго време ми беше јасно дека нема да бидам на располагање за Мундијалот 2022 во Катар“.
„Тоа е пред сѐ затоа што сакам целосно да му се посветам на Реал Мадрид во наредните години. Воедно, отсега ќе имам паузи кои не постоеја кога бев репрезентавец цели 11 години. Згора на тоа, како сопруг и татко, сакам да минувам време со мојата сопруга и деца“.
Крос дебитираше за Германија во 2010 година. Настапи на три Мундијали почнувајќи со бронза во 2010, потоа стана светски шампион во 2014, а последно во 2018 испадна уште во групите. На Европските првенства настапи исто така трипати, но без трофеј откако двапати доживуваше елиминација во полуфиналето во 2012 и 2016.