Актуелниот италијански шампион денеска го отвори првото коло во Серија А по паузата, совладувајќи ја Салернитана со 2:1 на гостувањето во Салерно.
Конечно продолжи и Калчото откако поради мундијалската пауза фудбалот на Чизмата мируваше од 13 ноември.
Бранителот на Скудетото имаше одличен почеток на натпреварот и по само 15 минути игра веќе дојде до убедливо водство од 0:2. Прво Рафаел Леау во 10. минута го отвори резултатот, а пет минути подоцна Сандро Тонали го дуплираше водството на асистенција на Брахим Диас.
Во вториот дел Оливје Жиру ја затресе домашната мрежа во 58. минута, но голот беше оправдано поништен поради офсајд. Потоа на 7 минути до крајот Федерико Бонацоли ја врати неизвесноста и надежта кај домашните постигнувајќи гол за 1:2. Сепак, домашните и покрај огромната поддршка од преполниот „Ареки“ немаа сили да постигнат уште еден гол и да го изненадат великанот.
За Салернитана на овој натпревар дебитираше најновото засилување, мексиканскиот голман Гиљермо Очоа.
Со оваа победа Милан дефинитивно останува на 2. место и по ова коло, со 5 бодови заостанување зад лидерот Наполи кој вечерва има тешко гостување во Милано кај Интер.
Во раниот термин од 12:30 часот се одигра и борбата за опстанок помеѓу Сасуоло и Сампдорија. Гостите од Џенова поведоа со 0:2 на „Мапеи“ стадионот со головите на Маноло Габјадини во 25-тата и на Томазо Ауџело три минути подоцна. Домашните во игра ги врати Доменико Берарди со гол од пенал во 64. минута, но „Неровердите“ не успеаја да дојдат и до втор гол за да се спасат од домашен пораз.
Денеска ќе се одигра комплетното 16. коло:
14:30
Специја - Аталанта
Торино - Верона
16:30
Рома - Болоња
Лече - Лацио
18:30
Кремонезе - Јувентус
Фиорентина - Монца
20:45
Интер - Наполи
Удинезе - Емполи
Наредното 17. коло се игра на 7, 8 и 9 јануари.
