Netflix го затвори третиот квартал со зголемени приходи, завршувајќи го шестмесечниот период на пад на претплатници.
Во периодот од јули до септември, компанијата го зголеми бројот на претплатници за 2,41 милиони, на повеќе од 223 милиони, благодарение на успехот на сериите како „Stranger Things“ и „Dahmer: Monster“.
Во претходните два квартали нивниот број се намали за 970.000, односно 200.000. Во САД и Канада нивниот број е зголемен за околу 100.000, во Европа, Блискиот Исток и Африка за 570.000, во Латинска Америка за 310.000, а во азиско-пацифичкиот регион за 1,43 милиони.
Во четвртиот квартал, Netflix очекува 4,5 милиони нови претплатници.
„По првата половина од годината која беше полна со предизвици, веруваме дека повторно сме на пат кон забрзување на растот“, се наведува во соопштението. Нето добивката се намали во третиот квартал за 3,5 отсто, на 1,4 милијарди долари или 3,1 долари по акција.
Приходите се зголемени за 5,9 отсто, на 7,92 милијарди долари. Кога ќе се исклучат валутните осцилации, приходот е зголемен за 13 проценти. Растот на приходите беше поттикнат од зголемувањето на просечниот број на платени стриминг членства за 5 отсто и зголемувањето на просечниот приход по членство за 1 отсто.
Netflix во четвртиот квартал очекува приход од 7,8 милијарди долари, нагласувајќи го негативното влијание на посилниот долар, кој, како што проценуваат, ќе ги намали приходите за цела година, за милијарда долари.