Огромен хендикеп за полската репрезентација откако најдобриот играч на светот за 2020 година, Роберт Левандовски, поради повредна нема да игра в среда против Англија, а можно е да не игра ниту за Баерн против ПСЖ во Лигата на шампионите.
Полска и Англија се очекува да ја бијат главната битка за првото место во квалификациската група И кое води на Мундијалот во Катар. Веќе задутре ја имаат и првата меѓусебна пресметка кога на „Вембли“ во Лондон доаѓа Полска.
Но, Полјаците ќе бидат и тоа како ослабени откако најголемата ѕвезда Роберт Левандовски поради повреда на лигаментите дефинитивно отпадна.
Тој синоќа од првата минута настапи на дуелот со Андора во Варшава. Ги постигна првите два гола во победата од 3:0, но во 63. минута мораше да биде заменет поради повреда.
Од полската федерација известија дека се работи за повреда на лигаментите од десното колено, повреда која бара мирување затоа што постои опасност да стане многу посериозна доколку Лева настапи под инјекција.
„Роберт Левандовски поради повреда нема да игра в среда на мундијалскиот квалификациски натпревар против Англија во Лондон“, соопшти ПЗПН.
„Клиничките испитувања покажаа дека се работи за оштетување на колатералниот лигамент во десното колено. Краткиот период до следниот натпревар не дозволува капитенот да биде достапен за овој натпревар. Тоа би претставувало преголем ризик поради влошување на повредата. Одлуката е правилна со оглед на тоа што ЕУРО 2020 е пред нас. Третманот за ваков тип на повреда обично трае од 5 до 10 дена. Поради тоа, Левандовски ќе се врати во Баерн каде ќе ја продолжи рехабилитацијата“, ја објаснуваат одлуката од полската федерација.
Иако натпреварот со Англија е и тоа како важен со оглед на тоа што само првото место води на Мундијалот, евентуален настап би значел и ризик за посериозна повреда и долга пауза со пропуштање на ЕУРО.
Многу веројатно е дека Левандовски ќе го пропушти и првиот натпревар на Баерн по интернационалната пауза и токму пресметката за врвот на Бундеслигата против Лајпциг. Воедно, можно е да не игра ниту на првиот четвртфинален дуел со ПСЖ во Лигата на шампионите, натпревар кој се игра наредната среда (7 април).
