Вчерашниот пораз дома од Манчестер Сити го запали алармот кај „Сините“, а американскиот интернационалец добро знае каде неговиот тим погреши.
„Примивме голови бидејќи дозволивме многу контра напади кои не бевме подготвени да ги сопреме и поради тоа разочаравме во првиот дел. Тие успеаја да нѐ добијат при транзициите каде требаше да се браниме подобро и да одиграме попаметно. Згора на тоа им дозволивме и да го диктираат темпото“, вели Кристијан Пулишиќ.
Манчестер Сити на полувреме замина со убедливи 3:0 со головите на Илкај Ѓундоан во 18. минута, Фил Фоден во 21. и Кевин Де Брујне во 34-тата. Челси заигра подобро по паузата, но веќе бељата беше направена и не успеа да избегне пораз.
„Моравме да излеземе назад на терен и да покажеме карактер. Ние никогаш нема да се откажеме, свесни сме дека имаме талентирани момци и добар тим, но тоа треба да го покажеме на терен, што и го направивме во вториот дел“, вели тој за официјалната клупска веб-страница.
„Сините“ упсеаја да го најдат патот до гостинската мрежа кога Калум Хадсон-Одои постигна гол по асистенција на Каи Хаверц, но тоа се случи дури во судиското надополнување.
„Не се лесно да се вратиш по три гола негатива, но се има случено и порано и поради тоа дадовме сѐ од себе и успеавме да постигнеме гол. За жал, беше премалку и предоцна“, заврши Американецот со хрватско потекло.