Статуите од стариот Египет најчесто немаат носови, а сега се откриени причините за тоа.
Египтолозите наведуваат дека постојат низа причини зошто египетските статуи останале без нос, односно дека се намерно уништувани.
Едвард Блејберг од Музејот за египетска уметност во Бруклин направи истражување на оваа тема. Резултат е изложбата на оштетени статуи и нивни делови.
„Начинот на кој се оштетени статуите јасно говори дека е тоа направено со намера“, изјави Блејберг пред американските медиуми. Експертите според начинот на кој се оштетени статуите можат да направат разлика дали станува збор за намерен вандализам или носот на статуата е искршен поради староста.
Старите Египќани им припишувале голема моќ на деловите од човечкото тело, верувале дека духот од починат човек може да се насели во статуа што го прикажува неговиот лик. Исто така, тие биле визуелен приказ кој имал моќ да раскаже приказна за тоа што се случувале и што треба да биде запаметено, вели Блејберт.
Поради тоа актите на вандализам имале за цел да ја уништат таа моќ, а Блејберг вели дека статуите биле место на спојување на натприродното и реалниот свет.
„Оштетениот дел на телото повеќе не може да ја врши својата функција, па така духот на починатиот кој се вселил во статуата повеќе не може да дише кога носот ќе се искрши, со што вандалите се обидувале да го убијат тој дух“, објаснува Блејберг.
Со уништувањето на ликовите некои владетели се обидувале да ја променат историјата во нивна корист, па поради тоа старите Египќани се обидувале да ги заштитат статуите ставајќи ги во тешко пристапни простории, во гробници или храмови.
Но, и оние кои ги уништувале статуите биле експерти за тоа. Судејќи според прецизноста на оштетување, постоеле вешти поединци најмени за таа работа. Така, често може да се види дека на удар биле и некои личности чии имиња биле дел од натписи. Тоа значи дека луѓето кои ги уништувале биле писмени, објаснува американскиот експерт.