Samsung е еден од најголемите технолошки гиганти во светот, а смартфоните се само дел од нивната работа. Сега компанијата развива интересно иновативно решение од сосема нова област кое е познато како Samsung Smart Windshield.
Во основа, ова решение е HUD екран за моторџиите, а изгледа вистински практично и корисно. Паметниот интерфејс овозможува да се следат информациите и нотификациите од смартфонот, но да се гледаат и мапите, без притоа да се симне погледот од патот.
На тој начин се елиминира потребата да се провери телефонот во текот на возењето, бидејќи системот се поврзува со смартфонот на корисникот и ги прикажува релевантните информации. Исто така има опција за автоматски да одговори на пораките и мејловите со претходно програмирани одговори.
Неколку компании веќе работат на шлемови со вграден сличен систем, но решението на Samsung изгледа како попрактична опција.
Во моментот ова решение е само концепт, но се надеваме дека ваквата технологија ќе се појави наскоро и ќе го направи возењето мотор уште побезбедно.