ПСЖ неодамна забележа голема пазарна победа. Успеа да го задржи Килјан Мбапе во Париз, најдобриот играч и човекот околу кој клубот планира да изгради нов проект во годините што следат.
Промена имаше и на функцијата спортски директор. Бразилецот Леонардо го напушти клубот, а на негово место дојде Луис Кампос, долгогодишниот спортски директор на Лил.
Токму Кампос беше доведен како човек кој треба да ја креира спортската политика на ПСЖ во следните неколку години, сè со цел порационално да се трошат парите и конечно трофејот од Лигата на шампионите да стигне до „Паркот на принцовите“.
Le Parisien денеска објави дека првиот чекор на Кампос ќе биде да го исчисти постоечкиот кадар.
Според реномираните француски медиуми, дури десет играчи на кои не смета Кампос ќе го напуштат клубот во овој преоден рок. Станува збор за Серхио Рико, Лајвин Курзава, Тило Керер, Абду Диало, Леандро Паредес, Андер Херера, Данило, Идриса Гује, Јулијан Дракслер и Мауро Икарди.
Анхел Ди Марија, кому му истече договорот, веќе го напушти клубот, а многу медиуми пишуваат дека од врвот на ПСЖ пристигнуваат информации дека шеиците се спремни да слушнат понуди за Нејмар. Тие не се склони да продаваат, но ако некој стави на маса сума што би ги заинтригирала, отворени се за преговори.
Покрај играчката загатка, Кампос го чека и процесот за избор на нов тренер. Le Parisien пишува дека Маурисио Почетино одамна ја загубил довербата на челниците на клубот и дека сега на Кампос е да донесе човек на кој ќе му го довери тимот.
Првиот обид за доведување нов тренер беше во насока на разговори со Зинедин Зидан, но француската легенда ја одби поканата на Париз бидејќи се надева, а според некои извори веќе е договорено дека ќе ја преземе француската репрезентација, по заминувањето на Дидие Дешам и Светското првенство во Катар.
Освен Зидан, како потенцијални нови тренери на ПСЖ се споменуваа Антонио Конте, Тиаго Мота и Јоаким Лоу, но засега нема информации кои би потврдиле дека активно преговараат со некој од нив.
