Цените на нафтата се искачија над 78 долари на меѓународните пазари во вторникот, бидејќи трговците се фокусираа на најавите за намалена понуда од главните извозници и прогнозите за поголема побарувачка во втората половина од годината.
На лондонскиот пазар цената на барелот по пладне беше повисока за 64 центи од вчерашното затворање на тргувањето и изнесуваше 78,33 долари. На американскиот пазар со барел се тргуваше за 71 цент поскапо, од 73,7 долари.
Фокусот на формирањето на цените денеска повторно се префрли на најавата на Саудиска Арабија и Русија за намалена понуда во август, но и на падот на доларот на најниско ниво во последните два месеци, што ја поддржува куповната моќ на купувачите со други валути, стимулирајќи побарувачката.
Инфлацијата во САД е исто така во фокусот на пазарите, бидејќи може да ја поттикне централната банка да ја промени политиката на промена на каматните стапки.
„Се искристализираше прагот на цените што може да се скрши само со жешката инфлација во САД и заклучокот на ФЕД дека мора да ја турне економијата во рецесија со монетарно затегнување“, рече Едвард Моја од OANDA.
Извештајот за инфлацијата ќе биде објавен денеска.
Претставници на американската централна банка велат дека најверојатно повторно ќе ги зголемат каматните стапки за да ја скротат инфлацијата, но пазарите се донекаде смирени од индициите дека циклусот на затегнување на монетарната политика се ближи кон крајот.
„Сепак, нервозата сè уште не е целосно стивната, сè уште постои вознемиреност дека проценката на побарувачката може да се намали поради можна рецесија“, објаснува аналитичарот на PVM, Тамаш Варга.
Меѓународната агенција за енергетика (IEA) сè уште очекува тесна понуда во втората половина од годината, и покрај забавувањето на светската економија, рече нејзиниот шеф во понеделникот, посочувајќи на најавениот помал извоз од главните производители и побарувачката во Кина и земјите во развој.
IEA ќе објави нови проценки оваа недела.
Неколку извори одделно изјавија за Reuters дека Кина повторно нарачала помалку нафта од саудиска Aramco.
Во исто време, генералниот секретар на Организацијата на земјите извознички на нафта (ОПЕК) прогнозира дека побарувачката за енергија во светот ќе се зголеми за 23 отсто до крајот на 2045 година.
Одделно, ОПЕК објави дека во понеделникот цената на барел од нафтената кошничка на нејзините членки се зголемила за 66 центи, на 79,09 долари.