Фудбалерите на Манчестер Сити имаа одлично гостување во Лисабон, но враќањето во Англија им беше многу непријатно.
Бурата Дадли беше во полна сила синоќа кога Манчестер Сити се враќаше од вторничкото гостување кај Спортинг во рамките на осминафиналето од Лигата на шампионите. „Граѓаните“ славеа со убедливи 5:0, но враќањето назад веројатно уште долго ќе го паметат.
Се враќаа со авионот Boeing 757 G-ZAPX на компанијата Titan Airways од Лисабон до Манчестер. Немаа никакви проблеми сѐ до моментот кога требаше да слетаат. Ветрови од западен правец со јачина од 74 километри на час го направија обидот за слетување мошне турбулентен.
На видеото се гледа како пилотите во неколку наврати преку давање силен потисок на моторите се обидуваат да го одржат авионот стабилен за слетување, но бурата Дадли се покажа како тежок противник по што беше одлучено да се одложи слетувањето. Авионот 15 минути кружеше над аеродромот правејќи три круга по што беше донесена одлука дека условите за слетување во Манчестер не гарантираат безбедност, па авионот се пренасочи кон Ливерпул каде успешно слета на аеродромот „Џон Ленон“.
„Можеме да потврдиме дека авионот кој го пренесуваше тимот дома од Лисабон безбедно слета во Ливерпул, откако силните ветрови нѐ принудија да се пренасочиме од Манчестер“, објави клубот.
„Добро е што попладнево можеме да им посакаме безбедно добредојде на Манчестер Сити во фудбалската престолнина на Англија, откако нивниот лет беше пренасочен од нивниот домашен аеродром поради силни ветришта“, објави синоќа ливерпулскиот аеродром.