Точно на денешен ден пред 33 години Наполи го прослави своето прво Скудето предводен од легендарниот Диего Марадона.
Во претпоследното коло во таа сезона 1986/87 Наполи дома на преполниот „Сан Паоло“ ја пречека Фиорентина. Со два натпревара до крајот, Наполи беше прв со 3 бода пред Интер и 4 пред Јувентус. Тогаш за победа сѐ уште се доделуваа по 2 бода, па „Аѕурите“ имаа добра предност.
Тоа мајско пладне второпласираниот Интер гостуваше кај Аталанта, додека третопласираниот Јувентус кај Верона. Интер загуби со 1:0, додека Јуве одигра 1:1, со што Наполи и покрај киксот дома и оние само 1:1 со Виола, стана шампион на коло до крајот.
Во 29. минута експлозија на „Сан Паоло“. Диего Марадона ја почнува акцијата, додава до Андреа Карневале кој пред шестнаесетникот проигрува со Бруно Џордано, кој пак веднаш со пета му ја враќа топката. Карневале потоа со десна со надворешна го мами противничкиот голман Марко Ландучи.
Но, гостите не се предаваат и само 10 минути подоцна израмнуваат со голот од слободен удар на младата ѕвезда Роберто Баџо.
До крајот резултатот останува непроменет и со оглед на резултатите од Бергамо и Верона, Наполи првпат во својата историја станува шампион на Италија.
Во таа златна генерација на Наполи покрај ѕвездата Марадона и голгетерите Карневале и Џордано, настапуваа и Клаудио Гарела, Џузепе Брусколоти, Чиро Ферара, Алесандро Реника, Морено Ферарио, Фернандо Де Наполи, Франческо Романо, Салваторе Бањи, Џузепе Волпечина, Луиџи Кафарели, Лучано Сола, Чиро Муро, Раимундо Марино, Тебалдо Биљарди и Рафаеле Ди Фуско. Предводник од клупата беше Отавио Бјанки.
