Продукциските компании Black Bear и BlockFilm потврдија дека работат на акциониот трилер Levon's Trade, во кој ќе глуми ѕвездата од франшизата Transporter и Fast & Furious, Џејсон Стејтам, пренесува Deadline.
Филмот ќе го режира Дејвид Ајер, режисерот на Suicide Squad, според сценарио напишано од Силвестер Сталоне.
Levon’s Trade е филмска адаптација на истоимениот трилер роман напишан од Чак Диксон. Романот е првиот од 11-те романи во популарниот серијал за Левон Кејд, поранешен специјален агент кој учествувал во борбата против тероризмот.
Филмот ќе покаже како Кејд (Стетам) ја напуштил старата професија и почнал да работи како градежник. Тој само сака да живее едноставен живот и да се грижи за својата ќерка, но откако ќерката на неговиот шеф мистериозно исчезнува, Кејд мора да се врати во матниот подземен свет за да ја најде. Неговата потрага по исчезната тинејџерка предизвикува верижна реакција на настани кои би можеле да го уништат неговото сегашно постоење.
Бил Блок, еден од продуцентите на филмот, кој го напушти Miramax минатиот месец, откри дека е оптимист за Levon’s Trade.
„Многу сум возбуден што повторно ќе работам со некои од моите најталентирани, долгогодишни партнери на Levon's Trade“, рече Блок.
„Levon’s Trade ќе биде спектакуларен акционен филм и сигурен сум дека успеавме да составиме тим од соништата, кој ќе го донесе првиот роман од познатиот серијал на големото платно“, додаде тој.
Снимањето на акциониот трилер Levon's Trade треба да започне во март 2024 година.
