Откако ФФМ најави дека ќе се обиде да го имплементира ВАР системот за пролетниот дел во најдобрата македонска лига, снимките од фудбалските терени сведочат дека тој веќе се тестира.
На неделниот натпревар на стадионот во паркот „Сарај“ функционалноста на ВАР се покажа на дело.
Четвртолигашот од Аеродром, ФК Слободен, кој се натпреварува во општинската лига на Кисела Вода, зимава си организира Зимска лига во која учествуваат три негови екипи: првиот тим (Сениори), младинскиот тим (У18) и тим составен од поранешни играчи (Мастерс). Целта е играчите да останат активни за време на големата зимска пауза.
Викендов силите ги одмерија Сениорите против У18, а славеа првотимците со 8:5. Во 33. минута, при резултат 2:2, играч на У18 влезе во шестнаесетникот, а од зад грб лизгачки старт му направи играч на првиот тим. Од снимката се гледа дека стартот е чист, на топка, но на судијата од неговиот агол му се виде дека е фаул и покажа најстрога казна - пенал.
Главниот судија потоа веднаш се упати крај аут-линијата, каде на мобилен телефон ја прегледа ситуацијата (натпреварот одеше во живо на стрим на YouTube!) и ја призна грешката, па досуди аут наместо пенал.
Инаку, во Зимската лига на ФК Слободен досега одиграни се пет кола, а се игра секој викенд. Возбудувањата продолжуваат дури и на, верувале или не, 1 јануари кога од 13:00 часот на стадионот „Сарај“ се среќаваат Мастерс против Сениорите во полуфинале од зимското куп натпреварување (финалето е на Божик). Тоа веројатно ќе биде прв пат во историјата на македонскиот фудбал да се игра фудбал на првиот ден од новата година. Се разбира, директен пренос ќе има на клупските канали на социјалните мрежи.
