Научниците открија дека гавраните можат да „бројат“ на глас, односно свесно да крекаат одреден број пати како одговор на визуелните и аудитивните дразби.
Иако способноста за разбирање на бројките е забележана кај други животни, како што се пчелите, овој тип на нумеричка писменост е забележан само кај луѓето.
„Свесното производство на одреден број вокализации бара софистицирана комбинација на нумерички способности и вокална контрола. Досега не сме свесни за тоа дека други животни можат да го направат тоа. Се покажа дека гавраните можат да произведат од една до четири вокализации како одговор на произволни знаци поврзани со нумерички вредности“, вели невронаучникот Дијана Љао од Универзитетот во Тубинген во Германија.
Способноста за броење на глас се разликува од самото разбирање на бројките. Покрај нумеричкото разбирање, бара и намерна гласовна контрола со цел комуникација. Познато е дека луѓето користат говор за да бројат нешто и да соопштат количина, пишува Science Alert.
Со оглед на тоа што претходно беше откриено дека гавраните разбираат покомплицирани нумерички концепти, како што е нула, Љао и нејзините колеги одлучија подетално да ги истражат нивните софистицирани нумерички вештини.
Тие тренираа три гаврани да произведат различен број вокализации, помеѓу еден и четири, откако ќе им биде покажан специфичен симбол или звучен знак. Откако ќе „гракнеа“ колку што треба, гавраните мораа да ја колвнат метата за да покажат дека завршиле со броењето.
Научниците откриле дека сите три гаврани можат да гракаат одреден број пати во согласност со дадениот стимул. Повремено правеа грешки, но најчесто со граќање еднаш премногу или премалку. Ова, велат експертите, е слично на начинот на кој бројат малите деца кои штотуку учат да кажуваат бројки.
Истражувањето Crows "count" the number of self-generated vocalizations беше објавено во списанието Science.
