Германскиот селектор Јоахим Лев нема да ги повика репрезентативците кои настапуваат во Премиер лигата за претстојните квалификациски натпревари вклучувајќи го и оној против нашата репрезентација.
Пандев и дружината, условно кажано, ќе имаат полесна задача во Дујсбург бидејќи Германија нема да може да настапи во најсилниот состав.
Предводникот Јоахим Лев во интервју за RTL откри дека во составот нема да ги вклучи играчите кои настапуваат на Островот поради рестрикциите за патувања кои се воведени кон Обединетото Кралтсво од страна на германските власти. Секој кој доаѓа од Островот во Германија мора да оди во двенеделен карантин, што е невозможно за потребите на репрезентацијата.
Тоа значи дека Германија против Македонија нема да може да смета на триото од Челси и тоа Тимо Вернер, Каи Хаверц и Антонио Ридигер, потоа голманот Бернд Лено од Арсенал, Илкај Ѓундоан од лидерот Манестер Сити и дефанзивецот на Лидс и соиграч на нашиот Алиоски, Робин Кох.
И без нив Германците имаат пеколен тим, а додатно Лев најави дека ќе ги повика младите таленти, 17-годишниот Флориан Вирц од Баер Леверкузен и една година постариот Џамал Мусиала од минхенски Баерн, двајцата офанзивни играчи од средниот ред.
Германија прво го прелекува Исланд на 25-ти во Дујсбург, потоа гостува кај Романија на 28, а на 31 е дуелот против Македонија.
