Селекторот на германската фудбалска репрезентација, Јоахим Лев, сепак ќе може да смета на играчите од англиските клубови за претстојните три натпревари во мундијалските квалификации, вклучувајќи го и оној против македонскиот состав на 31 март во Дујсбург.
Добрите вести за Лев, како што соопшти Германската фудбалска федерација, дојдоа откако локалните здравствени институции во Дујсбург се согласија да дозволат влез во Германија на фудбалери од Премиер лигата. За нив ќе важат условите од таканаречените „работни карантини“ кои не им дозволуваат контакт со лица надвор од просторот за тренинг и одигрување на натпреварите.
За влез од Обединетото Кралство на сила е задолжителен двонеделен карантин, мерка со која Германците се обидуваат да го спречат ширењето на британската мутација на COVID-19, а претходно таа одредба се однесуваше и на професионалните фудбалери.
Согласно дозволата од здравствените власти во Дујсбург, селекторот Лев за квалификациските натпревари во тој град против Исланд (25 март) и Македонија (31 март) ќе може да смета на играчот за врска на Манчестер Сити, Илкај Ѓундоан, голманот на Арсенал, Бернд Лено, како и на тројца фудбалери од редовите на Челзи, Тимо Вернер, Каи Хаверц и Антонио Ридигер.
Меѓу двата домашни натпревари, Германија на 28 март ќе ѝ гостува на Романија.