И покрај одличниот отпор и водството по првиот сет на Американецот Корда, српскиот ас направи пресврт во тесна борба и ја освои титулата на турнирот кој е предвесник на Австралија опен.
Младиот Себастиан Корда (22) од самиот почеток му стави дознаење на Новак дека е во финалето по изненадување. Го изнамачи Србинот и му го зеде првиот сет благодарение на тај-брејк победа од 10:8.
Вториот сет имаше слично сценарио, но овој пат Ѓоковиќ беше тој што го доби тај-брејкот за 7-6, или 1:1 во сетови.
Во решавачкиот сет Корда повеќе не можеше да парира, Ѓоковиќ освојуваше гемови на искуство и на крајот го доби сетот со 6-4 и со вкупни 2:1 го освои својот прв трофеј во новата 2023 година.
За Корда, кој е 13 години помлад од Новак, ова беше петто финале на еден АТП турнир, а го претрпе четвртиот пораз. Неговиот единствен трофеј останува триумфот на Емилија-Ромања опен во мај 2021 година.
За Новак ова е трофеј број 131 во кариерата, со што се израмни со Рафаел Надал на вечната листа. Се разбира, Ѓоковиќ сега ќе се сконцентрира кон главниот турнир месецов - Австралија опен.
