Најдобриот српски тенисер Новак Ѓоковиќ конечно ќе игра на американски турнир, бидејќи конечно му беше дозволен влез во САД без потврда за вакцинација против коронавирусот. Станува збор за Мастерсот во Синсинати.
Пред почетокот на првиот дуел, освојувачот на 23 грен слем титули се обрати пред медиумите и тврди дека веќе го „архивирал“ загубеното финале на Вимблдон. По освоените 38 мастерс турнири, Ѓоковиќ потврди дека сѐ уште е гладен за успех.
„Сè уште имам поттик и мотив да дојдам на најголемите турнири и да се обидам да победувам, да освојувам титули и да ја израдувам публиката“, изјави српскиот тенисер.
Ова ќе биде прв турнир за најодликуваниот тенисер во историјата по поразот во финалето на Вимблдон од Карлос Алкарас. Ѓоковиќ тврди дека овој пораз не оставил трага кај него.
„Финалето на Вимблдон? Тоа не беше ниту прв ниту последен меч што го загубив, па го преболев тој пораз за еден ден. Секако дека ќе ми требаше одмор по тој дуел, како и поминување време со моето семејство, и тоа и го направив. Жал ми беше што не ризикував за време на тоа финале. Бев во добра позиција во вториот сет, почувствував дека сум блиску до водство. Сепак, имаше брејк топки во петтиот сет. Беше многу неизвесно, но Карлос заслужи да победи бидејќи играше подобро во важните моменти, како што кажав по финалето. Ајде да одиме понатаму. Да не бев мотивиран, немаше да бидам тука. Сега, по долги години професионален тенис, чувствувам дека имам избор да го играм она што навистина сакам да го играм. И навистина сакав да бидам овде во Синсинати, а секако дека УС опен е зад аголот“, изјави српскиот ас на прес-конференцијата.
