Трикратниот МВП на НБА, кошаркарот на Денвер Нагетс, Никола Јокиќ, ќе игра за репрезентацијата на Србија на претстојните Олимписки игри во Париз.
Пред три дена Нагетс беа елиминирани во полуфиналето на плеј-офот на Западот, откако беа поразени од Минесота Тимбервулвс со 4:3 во партии и нема да ја бранат титулата во НБА.
По тој натпревар Јокиќ беше прашан за настапот на Олимписките игри.
„Не знам, ќе видиме, мора да размислам“, изјави актуелниот МВП на НБА додека превртуваше очи.
Сепак, како што дознава MaxBet Sport, Јокиќ на Олимписките игри сепак ќе игра за Србија.
Овој извор наведува дека најдобриот НБА кошаркар до крајот на неделата треба да пристигне во Србија, каде со семејството во Сомбор ќе го чека почетокот на подготовките на националниот тим на 24 јуни во Стара Пазова.
Јокиќ последен пат за Србија играше на ЕвроБаскетот во 2022 година кога Србите шокантно беа елиминирани од Италија во осминафиналето.
Селекторот на Србија, Светислав Пешиќ за Б92 ја демантираше оваа информација.
„Твитер новинар објави лажна вест… Навреме ќе добиете вистински информации“.
