Меѓународниот аеродром во Хонгконг започна тестирање на најнапредни системи за дезинфекција на луѓе од новиот коронавирус. На почетокот ќе се користи за вработените на аеродромот, но подоцна ќе се применува и на патниците.
Освен роботи кои со УВ светло ги дезинфицираат санитарните простории, аеродромот доби и специјална кабина Clean Tech J-1.
Пред влегување во кабината системот ќе ви ја измери температурата за да открие можност дали сте заразени, а кога ќе влезете внатре почнува процесот на дезинфекција од кој би требало да бидат отстранети 99 проценти на коронавирусот од површината на вашето тело и облеката, без негативни нуспојави по здравјето.
Од компанијата CleanTech велат дека кабината содржи систем кој со помош на фотокатализатори и нано игли ги убива сите бактерии и вируси со спреј што се наоѓа под притисок, односно изолациска техника која веќе се користи во болниците и медицинските центри за спречување на заразата.
Но, оваа дезинфекција нема да ви помогне ако веќе сте заразени, ниту ќе препознае заразен доколку истиот е без симптоми.
