Ѕвездата на мегахитот Barbie, Марго Роби, се огласи откако не доби номинација за Оскар во категоријата Најдобра актерка во главна улога.
Роби, која е и еден од продуцентите на филмот, рече дека не е тажна поради тоа. Таа додаде дека мисијата на филмот е да влијае на културата и дека ова е „најголемата награда“ што доаѓа од успехот на филмот.
„Нема шанси да се чувствувате тажни кога знаете дека сте вака благословени“, изјави таа.
Роби посочи дека е повеќе вознемирена што режисерката на Barbie, Грета Гервиг, не доби номинација за Оскар за режија.
„Мислам дека Грета треба да биде номинирана за најдобар режисер. Тоа што го направи е нешто што се случува еднаш во кариерата, еднаш во животот“, изјави таа.
Филмот Barbie заработи 1,38 милијарди долари на глобалниот бокс офис, што ги докажува погрешните предвидувања на експертите од индустријата дека Super Mario ќе биде најдобриот филм во 2023 година.
