Европскиот сервис Copernicus објави дека за време на месец мај се забележани највисоки температури на океанската површина без мраз, откако се вршат мерења.
„Температурите на површината на океанот веќе достигнуваат рекордни нивоа и нашите податоци покажуваат дека просечната температура за сите мориња без мраз во мај 2023 година била повисока отколку во кој било друг месец мај“, вели во соопштение Саманта Барџис, помошник директор на европскиот сервис Copernicus за климатски промени.
Податоците се засноваат на компјутерска анализа врз основа на милијарди мерења направени од сателити и бродови, авиони и метеоролошки станици ширум светот.
Некои од податоците користени од Copernicus доаѓаат од 1950 година, но повеќето од нив од 1979 година.
Просечната температура на површината на океанот (секогаш без зоните каде има мраз) во мај била околу 19,7 степени Целзиусови, односно 0,26 степени над просечната вредност за периодот од 1991 до 2020 година, изјави портпаролот на Copernicus.
Океанот, како сунѓер, апсорбирал околу 90% од зголемувањето на топлината предизвикано од човечките активности.
Тоа затоплување предизвикува домино ефект без преседан, велат Обединетите нации, како што се топење на мразот, зголемување на нивото на морињата, топлотни бранови на океаните и зголемување на киселоста на океаните.
Исто така се намалува капацитетот за апсорпција на јаглерод диоксид, а денес океанот апсорбира 25% од сите емисии на јаглерод диоксид.
Кога станува збор за температурите на целата планета, месец мај беше вториот најтопол досега забележан месец.
„Месецот мај 2023 година беше вториот најтопол мај на глобално ниво“, рече Барџис, додавајќи дека природниот феномен наречен Ел Нињо продолжува да се забележува во екваторијалниот Пацифик.
Ел Нињо е природен климатски феномен обично поврзан со зголемување на температурата, зголемена суша во некои делови од светот и обилни дождови во други.
Последен пат овој феномен се појави во 2018-2019 година, по што следуваше прилично долг период од речиси три години на феноменот Ла Ниња, што предизвикува спротивни ефекти, односно намалување на температурите.
Светската метеоролошка организација на почетокот на мај процени дека постои 60% веројатност Ел Нињо да се развие до крајот на јули и 80% да се случи до крајот на септември.
Површините на морињата (неполарните води) биле повисоки од годишниот температурен рекорд во април, покажуваат податоците на американската организација НОАА објавени на почетокот на мај.
