Barbie е неоспорниот филмски хит во кината за оваа година.
Досега има заработено околу 1,43 милијарди долари и стана најуспешен филм за оваа година, како и најуспешен филмски проект на Warner Bros.
Главните улоги ги добија Марго Роби (Барби) и Рајан Гослинг (Кен). Роби ја глуми стереотипната барбика, додека Гослинг го отелотвори нејзиниот шармантен и смотан дечко. Критичарите не само што го пофалија филмот, туку го издвоија 42-годишниот актер како негов најдобар дел.
Улогата на Гослинг како Кен беше толку добро прифатена и пофалена што многумина предвидуваат дека тој ќе биде номиниран за најдобра споредна машка улога на Оскарите следната година. Се верува дека најголеми претенденти за златната статуетка се тој и Роберт Дауни Џуниор, кој го играше Луис Штраус во Oppenheimer.
Според Variety, Рајан добил 12,5 милиони долари за улогата на Кен во филмот Barbie. Сепак, ова не е конечната заработка, бидејќи нема познати информации дали Канаѓанецот договорил дополнителни бонуси од продажбата на билети.
За споредба, Роби исто така добила хонорар од 12,5 милиони долари за улогата на Барби. Но, преку договорени бонуси стигна до заработка од 50 милиони долари. Barbie, заедно со Oppenheimer на Кристофер Нолан, успеа да ги врати луѓето во кината, како што беше пред пандемијата.
Дека овие два филма се големи летни блокбастери говори и фактот што успеаја да го потопат седмиот дел од Mission Impossible на бокс-офисот. Тој филм заработи „само“ 566 милиони долари и се смета за неуспешен бидејќи чинеше 300 милиони долари.
