Она за што се шпекулираше кон крајот на преодниот рок во јануари, сега Горан Пандев го потврди. Имал директна понуда да се врати во Интер, но решил да не ја прифати.
„Ми се јави Пјеро Аузилио на претпоследниот ден од преодниот рок. Ми понуди да ги одиграм наредните шест месеци, а потоа да станам дел од управата на клубот. Го прашав да не ми прави некоја шега, па шегувајќи се му реков да побара некој помлад. Потоа се слушнав со Ѕарбани, а тој ми рече: 'Горан, не ни помислувај да си одиш'. Всушност и не ни сакав да си одам“, открива Пандев за Sky Sport.
Пандев дојде во Интер летото 2001 година од редовите на струмичка Беласица кога имаше само 18 години. Не доби шанса во првиот тим, беше пратен на позјамица во Специја и Анкона, а потоа замина во Лацио како дел од трансферот на Дејан Станковиќ. Во Интер се врати на барање на Жозе Мурињо зимата 2010 и беше дел од златната генерација која стана европски и светски шампион.
„За мене Интер е сѐ, клубот кој ме донесе во Италија и кој ми го промени животот. Имаше контакт, но јас од почеток на сезоната бев решен што да правам“, вели Горан.
Летово ќе полни 37 години и тоа е причината поради која одбил да се врати во Интер и покрај тоа што бил желба на Антонио Конте. Пандев имаше во план летово да замине во пензија, по завршувањето на ЕУРО 2020, но откако тоа се одложи за наредната година се одложи и неговото пензионирање.
