Беа забележани неочекувани тешкотии во првите денови од користењето на вакцината Pfizer, вклучувајќи дози кои биле складирани на премногу ниски температури и потенцијални предизвици за компанијата Pfizer во производството, соопштија американските власти.
Најмалку два контејнери со дози на вакцина против коронавирус, кои беа доставени во Калифорнија, требаше да бидат заменети затоа што се чувале на температура под -80 степени Целзиусови, изјави американскиот воен генерал Густав Перна.
Вакцините што се резултат на заедничката работа на Pfizer и BioNTech треба да се чуваат на температура од околу -70 степени Целзиусови.
Официјалните лица испитуваат дали чувањето на вакцините на претерано ниски температури претставува ризик за нивната безбедност и ефикасност, додаде Перна.
Pfizer соопшти и проблеми со производството на вакцините, изјави американскиот секретар за здравство Алекс Азар.
„Ќе им обезбедиме целосна поддршка преку кој било механизам за да можат да произведуваат вакцини за Американците“, рече Азар.
Угур Сахин, извршен директор на BioNTech, за Reuters минатата недела изјави дека првичната цел за производство на 100 милиони дози на вакцини во 2020 година била преполовена, делумно поради потешкотии во снабдувањето со суровини. Тој додаде дека проблемот е решен во меѓувреме и дека производството на голема количина вакцини продолжува.
Едно лице од здравствениот систем од американската сојузна држава Алјаска доживеа силна алергиска реакција откако во вторникот ја прими првата доза на вакцината против коронавирус, произведена од Pfizer и BioNTech, пишува New York Times.
Три лица запознаени со случајот за New York Times изјавија дека дотичното лице е хоспитализирано и уште е во болница. Лицето наводно немало претходни проблеми со алергии на какви било лекови и не е познато дали можеби страдало од какви било други алергии.
Алергиската реакција на вакцината кај таа личност наводно била слична на анафилактичниот шок што го претрпеле двајца здравствени работници во Велика Британија, исто така по примање на вакцината Pfizer. И двајцата се опоравија.
