Суперлигашот Пролет го комплетираше првиот трансфер во пресрет на новата сезона, потпишувајќи двегодишен договор со Стефан Стојчевиќ.
Овој перспективен пивот доаѓа од редовите на Алкалоид, каде не доби премногу голема минутажа по ланскиот трансфер од таборот на Бутел.
„Станува збор за исклучително талентиран ракометар кој ќе биде од голема помош во нападот и во одбраната, покривајќи ја пивотменската позиција што остана испразнета по заминувањата на Арсеновски и на Крстевски“, објави клубот од истоимената скопска населба.
Пролет успеа да го задржи во своите редови Александар Василевски, со кого потпиша нов договор, па искусниот лев бек и во новата сезона ќе ги брани боите на суперлигашот.
„Василевски важи за беспрекорен шутер, на неколку овосезонски натпревари беше и најдобар стрелец на Тинекс Пролет, а игра и значајна улога во одбраната на тимот на Александар Јовиќ“, велат пролеќани.
Од Пролет велат дека продолжуваат со преговори за ангажман на уште неколку засилувања со кои би бил заокружен ростерот за наредната натпреварувачка сезона во која пролеќани ќе се обидат да бидат поконкурентни откако изминатава сезона завршија на 7. место во плеј-оф групата со само 3 победи и дури 11 порази. Зад Пролет на табелата беше само Струга.
