Европската ракометна федерација (ЕХФ), го објави списокот на клубови кои се во конкуренција за настап во Лигата на шампионите во сезоната 2024/2025. Следната сезона ќе биде последна која ќе се игра во овој, за многумина здодевен формат, две групи со по 8 екипи.
ЕХФ објави дека сигурни учесници се шампионот Барселона, односно Алборг, Пари Сен-Жермен, Магдебург, Фихсе, Веспрем, Колстад, Висла и Спортинг.
Остануваат уште седум места. Специјална покана од ЕХФ официјално побарале 12 клубови, што значи дека пет ќе извисат. Меѓу клубовите кои поднеле барање за специјална покана е и македонскиот првак, Еурофарм Пелистер.
Извесно е дека полскиот, унгарскиот и францускиот вицешампион Кјелце, Пик Сегед и Нант, како и хрватскиот и романскиот шампион Загреб и Динамо од Букурешт, ќе бидат дел од евроелитата следната сезона.
За преостанатите две места кандидати се вицешампионите на Данска, Шпанија, Португалија и Норвешка: Фредерисиа, Бидасоа, Порто и Елверум, како и пампионите на Швајцарија, Македонија и Словачка: Кадетен, Еурофарм Пелистер и Татран.
ЕХФ наредната среда ќе одлучи на кои адреси ќе испрати специјални покани, а конечниот состав на Лигата на шампионите ќе биде соопштен во петок на 21 јуни на состанокот на Извршниот комитет на ЕХФ во Осло.
Извлекувањето на групите е закажано за 27 јуни во седиштето на Европската ракометна федерација во Виена.
