Латералниот бек на македонската фудбалска репрезентација е пресреќен што конечно публиката се враќа на стадионите и утре Македонија ќе игра фудбал со гледачи на трибините.
Македонската репрезентација утре од 18 часот на Националната Арена „Тоше Проески“ во Скопје го игра првиот од двата пријателски натпревари пред дебитансткиот настап на ЕУРО 2020. Противник е стариот познаник Словенија, но она што е важно е што Владата дозволи да има 30% публика на трибините.
„Одамна не сме го виделе стадионот со публика. Ете, се надевам и дека Федерацијата ќе пушти уште некоја карта повеќе за да биде тоа една преубава вечер затоа што и македонската нација заслужи да нѐ гледа после толку долга пауза“, рече Стефан Ристовски на денешната прес-конференција.
Македонија последен пат на домашен терен играше фудбал со публика на 19 ноември 2019 година кога со 1:0 го совладавме Израел во последното коло од регуларните квалификации за ЕУРО 2020. Тогаш имаше точно 5.573 гледачи на трибините.
„Се подготвуваме одлично, атмосферата во репрезентацијата е на едно високо ниво, очекуваме утре наша добра игра и победа. Македонија на секој натпревар игра на победа. Фудбалот затоа и е толку посебен. Изгубивме од Австрија, а успеавме да ја победиме Германија на гостински терен. Кој и да излезе утре на терен, што се однесува до составот, значи дека е во првиот тим. На селекторот е да одлучи. Кој и да настапи ќе даде максимум и ќе одигра пожртвувано и борбено за националниот дрес“, додаде десниот латерален бек.