Поради својот специфичен дизајн, овој тип на раскрсница ја елиминира потребата за престројување на возилата, како и можните конфликтни ситуации во кружниот тек.
Во изминативе години, кружните текови или раскружници сѐ повеќе се користат во нашата земја како сообраќајно решение за раскрсници, каде што е тоа можно и каде што можат да го забрзаат протокот на сообраќај.
Сепак, сообраќајните кружни текови со две или повеќе ленти честопати претставуваат тешкотија за возачите кои не се снаоѓаат добро во такви ситуации.
Во овие случаи, доаѓа до проблеми со погрешно престројување пред и во рамките на самиот кружен тек, како и недоумици за тоа кое од двете возила има предност. Не е невообичаено да се биде сведок на инциденти, па дури и сообраќајни несреќи во кружниот тек.
Сообраќајните експерти најдоа начин да го направат кружниот тек побезбеден. Така се создадени „турбо-раскружници“ во форма на спирала, кои првично се користеле во Холандија, а подоцна биле применети и во други земји.
Тоа е крстосница каде со сообраќајна сигнализација, уште пред да се влезе, но и во самиот кружен тек, јасно е одредено по која лента се движи возилото од моментот кога влегува во кружниот тек, додека не излезе.
На овој начин се избегнува престројување на возилата во кружниот тек, што покрај забавување на движењето на возилата, може да доведе и до конфликтни ситуации.
Како функционира турбо кружниот тек можете да видите во видеото и анимацијата подолу: