Пред два дена, Министерството за здравство соопшти дека во сезоната 2020/2021 година вкупниот број заболени од сезонски грип изнесува 539, што е за 92,5 отсто помалку споредено со истиот период лани и 94,5 отсто помалку во однос на типичната сезонска крива. Па, се поставува прашањето каде исчезна грипот?
Ситуацијата е слична и во Србија и во Хрватска, сите го очекувавме грипот и предупредувавме за негово вкрстување со коронавирусот, но во последните месеци е забележано историско ниво на ниска циркулација на грипот.
Луѓето низ светот ги интересира за што станува збор, а се шпекулира дека тоа е така затоа што грипот е помалку пренослив и поради превентивните мерки кои се на сила, но и наводно затоа што тестовите не се доволно ефикасни за да разликуваат грип од SARS-CoV-2 бидејќи припаѓаат на исто „семејство“ на коронавируси.
Вирологот д-р Ана Глигиќ, која е во пензија, за b92 вели дека за исчезнувањето на грипот постојат барем две добри причини. Првата го потврдува општоприфатеното верување дека мерките преземени во пандемијата како носење маски и физичка дистанца влијаат на тоа и нè штитат од грипот. Втората причина им е помалку позната на лаиците.
„Постои интерференција во вирологијата, а тоа е кога еден вирус му оневозможува на друг да го пронајде своето место да продре во човечкиот организам и да го прави тоа што вообичаено го прави. Не го исклучувам ни тоа дека лабораториите се преокупирани со коронавирусот и не работат ништо друго, особено затоа што почнуваат со исти симптоми како истоштеност и температура. Во таа ситуација може да се случи да имало случаи, но да минале незабележани. Истото го мислам и за мутирањето на вирусот, дека се појавил кај нас многу порано. Во Англија е откриен дури откако се заразиле повеќе од 50 проценти од луѓето“, вели д-р Глигиќ за b92.
