Еден од највисоките кинески облакодери беше евакуиран денеска откако почна да се ниша, а луѓето во паника избегаа на сигурно.
Облакодерот SEG Plaza висок скоро триста метри, што се издига во јужниот град Шенжен, необјасниво започна да се ниша околу 13 часот по локално време, па веднаш беше извршена евакуација на луѓето внатре, додека минувачите на околните улици гледаа во шок.
Зградата беше затворена во 14 часот и 40 минути по локално време, објавија локалните медиуми.
Завршена во 2000 година, сместена во срцето на еден од најбрзо растечките градови во Кина, кулата е дом на еден од најголемите пазари за електроника.
*Внимание! Содржината на видеото може да ве вознемири!
Причината за нишањето сè уште не е позната
Агенцијата за управување со вонредни состојби истражува што предизвикало нишање на облакодерот во округот Футиана во Шенжен, според објавата на платформата Weibo, позната како кинескиот Twitter.
„По проверка и анализа на податоците на различните станици за следење на земјотреси низ градот, беше заклучено дека денес немало земјотреси во Шенжен“, се вели во соопштението.
„Причината за нишањето ја проверуваат различни оддели.“
Засега е непознато што ќе стори владата во случај на опасност од паѓање на зграда од оваа големина, лоцирана во центарот на градот со 12 милиони жители.
„SEG е целосно евакуирана“, напиша еден корисник на Weibo во описот на објавеното видео.
Кулата е именувана според производителот на полупроводници и електроника Shenzhen Electronics Group, чии канцеларии се наоѓаат во таа зграда.
Според Советот за високи згради, таа е 18-та највисока кула во Шенжен.
Кинеските власти минатата година забранија изградба на облакодери повисоки од 500 метри.
Уривањето на згради не е невообичаено во Кина каде градежните стандарди се слаби, а поради зачудувачката урбанизација, изградбата се одвива набрзина.
