Кога наутро ќе ви заѕвони алармот, можеби прво што ви доаѓа на ум е да го притиснете копчето за одложување. Не сте единствени кои го правите тоа, во пракса истата навика ја имаат милиони луѓе низ светот.
Според нова студија од Универзитетот Нотр Дам во Индијана, 57% од возрасните луѓе обично сакаат по огласување на будилникот уште малку да поспијат, така што се потребни уште неколку ѕвонења за конечно да се разбудат и станат од креветот.
Научниците предупредуваат на штетноста на одложување со аргумент дека тоа може да го наруши циклусот на спиење бидејќи исклучувањето на будилникот и продолжувањето на дремење во кревет доведува до тоа нашето тело да „мисли“ дека сме во следниот циклус на спиење кој се прекинува кога навистина ќе се разбудиме.
„Она што досега го знаеме за спиењето е преземено од податоци за сонот, стресот или сличните однесувања“, вели Стивен Метингли, главен автор на студијата и истражувач во Нотр Дам.
Студијата ја правел со колегата Арон Стригел, професор по компјутерски науки и инженерство.
„Будилниците, паметните телефони и сличните уреди имаат копче за одложување. Експертите генерално се против употреба на тоа одложување, но кога тргнавме во потрга за факти кои неспорно го докажуваат тоа, ги немаше. Сега имаме податоци кои докажуваат колку всушност тоа однесување е вообичаено, но сепак малку детали се познати за оваа навика“, наведоа авторите.
Во студијата учествувале 450 возрасни луѓе кои работеле полно работно време и пополниле анкета и прашалник за нивните навики во спиењето. Уредите кои ги носеле исто така биле употребени за мерење на траењето на спиење и отчукувањата на срцето кај учесниците.
Резултатите се објавени во Sleep и покажуваат дека жените за 50% повеќе дремат од мажите.
„Голем број луѓе го одложуваат будењето бидејќи се чувствуваат хронично уморно“, вели Метингли.
