Според новите податоци, дијабетесот што го развиле пациенти со тешка форма на COVID-19 за време на хоспитализација може да биде само привремен, а нивото на шеќер во крвта може да се врати во нормала по закрепнувањето.
Истражувачите спровеле студија на 594 пациенти кои покажале знаци на дијабетес откако биле хоспитализирани поради ковид, од кои на 78 испитаници претходно не им бил дијагностициран дијабетес.
Поблаги проблеми со шеќерот во крвта, но потешка форма на ковид се забележани кај многу пациенти на кои им бил дијагностициран дијабетес за време на хоспитализација, во споредба со пациентите кои претходно имале дијабетес.
Истражувачите објавија во Journal of Diabetes and Its Complications дека кај 40 проценти од пациентите на кои им бил дијагностициран дијабетес за време на хоспитализацијата, една година подоцна, нивото на шеќер во крвта паднало под границата за дијагноза.
„Овие резултати сугерираат дека новодијагностицираниот дијабетес може да биде преодна состојба поврзана со акутен стрес предизвикан од инфекција со коронавирус“, рече д-р Сара Кромер од Општата болница во Масачусетс во Бостон.
„Резултатите од нашата студија укажуваат дека појавата на дефицит на инсулин, доколку воопшто се појави, не е трајна“, вели Кромер.
„На овие пациенти им е потребен само инсулин и други лекови за кратко време, поради што е исклучително важно лекарите внимателно да го следат текот на болеста за да утврдат дали и во кое време нивната состојба ќе се подобри.“