Пицата е едно од омилените јадења во целиот свет. Ви предлагаме да го пробате овој рецепт од соседна Србија за малку необична пица со сланина и кисели краставички.
Пицата е познат италијански специјалитет, а најпознати се маргерита и капричоза. Денес се прави во многу земји, а сите пицаџии кои го подготвуваат си ставаат свој личен печат. Ви предлагаме да направите пица по српски рецепт со сланина и кисели краставички со тесто кое сами ќе го замесите. Веруваме дека на многумина ќе им се допадне ова гурманско јадење.
Потребни состојки:
- доматен сос
- 200 гр сланина
- 400 гр шунка
- 350 гр кашкавал
- 5-6 кисели краставички
- 150 гр печурки
- оригано
За тестото:
- 350 гр брашно
- 3 лажици маслиново масло
- 1/2 коцка квасец
- 1 лажица шеќер
- 250 мл вода
Подготовка:
Во млака вода додадете издробен квасец и шеќер, па добро измешајте. Оставете го 10 минути да се активира, а потоа додадете просеано брашно и маслиново масло. Месете го тестото за пица. Покријте со проѕирна фолија и оставете 10-15 минути да нарасне. Тестото за пица развлечете го со дебелина од половина прст, па префрлете го во плех подмачкан со масло.
Премачкајте го со доматен сос, па одозгора посипете ја ренданата шунка, па наредете ги сечканите печурки и сланина, како и краставиците. Најгоре изрендајте кашкавал и посипете со оригано. Печете ја пицата во загреана рерна на 180°C околу 20 минути.
