Клоп го разнежни подарок од навивач на Ливерпул, ќе го чува на посебно место

Јирген Клоп веќе е дел од славното минато на Ливерпул.

Германскиот тренер минатата недела го одигра последниот натпревар на „Енфилд“ против Вулверхемптон (2:0), а неговото збогување со навивачите беше многу емотивно.

Како дел од неговото збогување, илјадници навивачи на Ливерпул му испратија подароци и писма со благодарност за она што го постигна во текот на деветте години минати во „црвените“, а Клоп отвори дел од нив пред клупските камери.

Но, еден подарок посебно му го привлече вниманието. Тоа е музичка кутија.

Кога ја слушна музиката, се возбуди и вети дека ќе ја чува на посебно место дома: „Ова ќе биде во собата за трофеи. Ви благодарам многу. Апсолутно убаво“, изјави Клоп.

Инаку, станува збор за тактови од познатиот хит на Битлси „I Feel Fine“ кои навивачите на Ливерпул му ги посветија на легендарниот Клоп со зборовите „I'm so glad that Jurgen is red“ (Многу ми е мило што Јирген е црвен).

Да потсетиме, Ливерпул официјално го претстави новиот тренер, Холанѓанецот Арне Слот, кој ќе го наследи Јирген Клоп на клупата на „црвените“.

Слот во Ливерпул пристигнува од Феенорд, каде имаше активен договор, но „црвените“ го купија со постигнување договор со овој холандски клуб.