Луис Енрике синоќа во стартните единаесетмина го стави 17-годишниот играч на Барселона - и не погреши, а со тоа Гави влезе во историјата како најмлад репрезентативец.
Новиот Чави е Гави. Роден на 5 август 2004 година во гратчето Лос Паласиос и Виљафранка во Андалузија, Пабло Мартин Паес Гавира потекнува од младинската академија на Бетис, а од свои 11 години е дел од Барселона.
Сезонава дебитираше за сениорскиот тим на Барса и е најсветлата точка во очајниот тим на Каталонците. Токму поради тоа го привлече и вниманието на селекторот Луис Енрике кој поради многубројните отсуства одлучи да го вклучи тинејџерот во тимот за фајнлфор турнирот во Лигата на нации. Синоќа, дури и го стави во оган вметнувајќи го во почетниот состав.
Со својата игра Гави се претстави пред светската јавност во најдобро можно светло, импресионирајќи со динамиката и техниката. И не само тоа, туку со него Шпанија ја победи Италија, актуелен европски шампион, и тоа на нејзино тло среде Милано, каде никогаш претходно „Аѕурите“ не беа поразени. Барселона дефинитивно има иднина, го има новиот Чави.
Со 17 години и 62 дена Гави стана најмладиот фудбалер кој го облекол шпанскиот дрес, рушејќи го 85 години стариот рекорд на Баскиецот Ангел Субиета поставен во 1936 година. Интересно, Субиета иако дебитирал млад одиграл вкупно само 2 натпревара за Шпанија, но затоа 34 пати играл за непризнаената репрезентација на Баскија.
Пред Гави, најблиску до рушење на рекордот за најмлад играч беше неговиот соиграч од Барса, Ансу Фати, кој со 17 години и 308 дена лани дебитираше за Шпанија.
„Гледајте колку добри се децата во Шпанија! Не е нормално да се гледа играч со ваков карактер, ваква самодоверба на неговото деби. Тој ќе биде иднината на Шпанија, а мислам дека и сегашноста. Верати е неговиот идол. Му реков: 'Денеска ќе правиш притисок врз Верати од почеток до крај. Многу му се допадна тоа'“, рече синоќа Луис Енрике во изјава за RAI.
Гави синоќа не беше единствениот дебитант кај Шпанија. И една година постариот Јереми Пино, играч на Виљареал, го запиша првиот настап кога влезе во игра во 47. минута на местото на повредениот Феран Торес.
Ако ова се резервистите на десеткуваната Шпанија, тогаш следува нова златна генерација во шпанскиот фудбал.
