Тренерот на Интер е убеден дека неговиот тим играл добро, но среќата го одминала.
„Нераѕурите“ синоќа пропуштија голема шанса да го преземат врвот на табелата во Серија А откако загубија на гостувањето во Џенова кај тимот на Сампдорија. Во 12. минута се очекуваше водство на Интер, но Алексис Санчес не реализираше пенал бидејќи голманот Емил Аудеро одбрани, а набрзо потоа Антонио Кандрева погоди за домашните. Во 38. минута Кеита Балде се погрижи за 2:0. Во вториот дел Стефан де Врај со глава намали на 2:1, но тоа беше сѐ што Интер успеа да направи.
„Беше чуден натпревар. Се најдовме во една ситуација од промашен пенал до примени два гола набрзина еден по друг, што ни ги отежна работите. Сепак, тимот играше добро и создаде многу шанси за гол. Понекогаш, можете да загубите натпревари на кои сте доминирале. Кога веќе бевме во два негатива, стана тешко. Пробавме, но не бевме во можност да извадиме добар резултат“, рече Конте.
Поради повреда беше најавено дека голгетерот Ромелу Лукаку нема да игра, но тој се најде на клупата и Конте беше приморан да го стави во игра во вториот дел. Но, ни тој не помогна да се избегне пораз.
„Не беше првпат да играме без Ромелу. Јасно едека тој е играч со одредени квалитети, но не беше 100% подготвен, што и се виде кога влезе во игра. Разочарани сме бидејќи заслуживме повеќе“.
„За да се подобриме, мора да ги анализираме позитивните аспекти од овој натпревар, но и оние кои не ни одеа од рака. Сепак, како што веќе реков, беше чуден натпревар. Момците покажаа посветеност и желба, но фортуната нѐ заборави“, вели тој.
Со 41 гол на 16 натпревари Интер сезонава е најефикасен тим во лигата, за што заслуга секако има Конте и неговата офанзивна тактика. Затоа, пак, одбраната прими дури 21 гол.
„Имајќи ги предвид сите шанси кои ги направивме, верувам дека сме одлични во нападите. Ја користиме широчината на теренот, нашите играчи од средината одат напред, а тука е и целата работа која ја прават двата напаѓачи. Веројатно во првиот дел од сезоната ни недостасуваше малку баланс. Примивме многу голови, но затоа немам поплаки за играта во нападот и начинот на кој освојуваме простор. Сите голови кои ги дадовме оваа сезона и мината се плод на ваквата игра“
